నాగర్ కర్నూల్ బీఆర్ఎస్ ఎంపీ అభ్యర్థిగా ఆర్.ఎస్.ప్రవీణ్ కుమార్ ని ఆ పార్టీ అదినేత కేసిఆర్ ప్రకటించారు.చట్ట సభల్లో బహుజన వాదం బలంగా వినిపించాలంటే నాగర్ కర్నూల్ లో తనను గెలిపించాలని బీఆర్ఎస్ ఎంపీ అభ్యర్ధి ఆర్ఎస్ ప్రవీణ్ కుమార్ అభిమానులు, కార్యకర్తలకు సోషల్ మీడియా ద్వారా విజ్ఞప్తి చేశారు. తన ఉద్యోగానికి కూడా రాజీనామా చేసి రాజకీయాల్లోకి వచ్చిందే బహుజనుల బంగారు జీవితం కోసమన్నారు. తెలంగాణ వాదం.. బహుజన వాదం ఒక్కటేనన్న నమ్మకంతోనే బీఆర్ఎస్ అధినేత కేసీఆర్ తో కలిసి నడుస్తున్నట్లు చెప్పారు. బీజేపీ కుట్రల నుండి దేశాన్ని రక్షించే దమ్ము-ధైర్యం కాంగ్రెస్ పార్టీకి లేదని.. అందుకే తాను బీఆర్ఎస్ లో చేరినట్లు వెల్లడించారు. ఈ పార్లమెంట్ ఎన్నికల్లో ప్రతి ఒక్కరు తనకు సపోర్ట్ చేయాలని విజ్ఞప్తి చేశారు. అంతేకాకుండా నాగర్ కర్నూల్ అభ్యర్ధిగా ప్రకటించిన తెలంగాణ తొలి ముఖ్యమంత్రి కేసీఆర్ కు ఆర్ఎస్ ప్రవీణ్ కుమార్ సోషల్ మీడియా వేదికగా ధన్యవాదాలు తెలిపారు.
ఆర్.ఎస్.ప్రవీణ్ కుమార్ ఎక్స్ వేదికగా చేసిన విజ్ఞప్తి..
శ్రేయోభిలాషులకు ఒక ప్రార్థన
నా రాజకీయ ప్రస్థానంలో ఇటీవల జరిగిన కొన్ని పరిణామాలు మిమ్ములను బాధ పెట్టి ఉండవచ్చు. నాకు కూడా బాధగానే ఉంది. ఒక ఉన్నతమైన లక్ష్య సాధన కోసం కొన్ని త్యాగాలు తప్పవు.అయితే విషయాన్ని అర్థం చేసుకోకుండా, నా మీద సోషల్ మీడియా వేదికగా కొన్ని శక్తులు (కొంత మంది ఆప్తులతో సహా!) తీవ్రమైన దాడి చేసినయి. ఇంకా చేస్తూనే ఉన్నాయి. ఇలాంటి అనాగరికమైన దాడులు నాకు కొత్త కాదు. నన్ను, పేద ప్రజల జీవితాలను సమూలంగా మార్చాలన్న నా లక్ష్యం నుండి ఈ చిల్లర దాడులు దూరం చేయలేవు.నన్ను దయచేసి నమ్మండి..నేను ఇన్నాళ్లూ నిస్వార్థంగా పీడిత ప్రజలకోసమే పనిచేశాను. చట్ట సభల్లో కూడా మీ గొంతుకగా ఉండాలనే లక్ష్యంతో ఎంతో విలువైన ఉద్యోగాన్ని సైతం వదలి రాజకీయాల్లోకి వచ్చాను. అసెంబ్లీలో బహుజనుల గొంతుకగా ఉండాలని రాత్రింబవళ్లు శ్రమించినా మొదటి ప్రయత్నంలో విఫలమయ్యాను.
తెలంగాణ వాదం -బహుజనవాదం రెండూ ఒకటేనని నమ్మి ఎంతో శ్రమించి శ్రీ కేసీఆర్ మరియు బెహన్జీ మాయావతి గార్లను ఒప్పించి తెలంగాణలో చారిత్రాత్మక పొత్తు ఏర్పాటయ్యేలా చూశాను. కానీ కొన్ని అనివార్య కారణాల వల్ల అది చివరి నిమిషంలో రద్దయినప్పటికీ, ఇచ్చిన మాట మేరకు విశాల తెలంగాణ ప్రయోజనాలను దృష్టిలో ఉంచుకొని, దేశంలో కోట్లాది బహుజనుల బంగారు భవిష్యత్తు కోసం, భారత రాజ్యాంగ విలువల రక్షణ కోసం, కేసీఆర్ తోనే కలసి ప్రయాణించాలనుకున్నాను. బీజేపీ కుట్రల నుండి దేశాన్ని రక్షించే ధమ్ము-ధైర్యం కాంగ్రేసుకు ముమ్మాటికీ లేదు. అందుకే నేను ఇటీవలే భారాసలో చేరాను.ఈ యుద్దంలో కేసీఆర్ మార్గదర్శనంలో సర్వశక్తులొడ్డి విజయం కోసం పోరాడతాను. దయచేసి మీరు కూడా నాతో రండి. మీకు చేతనైన సాయం చేయండి. మీ విలువైన సమయమివ్వండి. నాగర్ కర్నూల్ నియోజకవర్గానికి వచ్చి ‘కారు’ గుర్తుకు ఓటెయ్యమని ఇంటింటికి ప్రచారం చేయండి. లేదా మీకు తెలిసిన వారికందరికీ కనీసం ఫోన్ చేసయినా చెప్పండి.
నేను చట్టసభల్లో కూర్చుంటే మీరందరూ అక్కడ కూర్చున్నట్లే….
నేను నేను కాదు…నేను మీరే…
మనమందరమూ…
ఛలో నాగర్ కర్నూల్
జైభీం…జై తెలంగాణ..జై భారత్
అంటూ ఆర్.ఎస్.ప్రవీణ్ కుమార్ ఎక్స్ వేదికగా చేసిన విజ్ఞప్తి చేసారు.